595 पटक हेरिएको 
नेपालगञ्ज, २ जेष्ठ । संघीय समाजवादी फोरम नेपालका अध्यक्ष उपेन्द्र यादवले दोस्रो चरणको स्थानीय तहको निर्वाचन मिति सार्नुपर्ने माग गरेका छन् ।
मंगलबार नेपालगञ्जमा भएको बृहत पार्टी प्रबेश सभा कार्यक्रममा बोल्दै यादवले दोस्रो चरणको स्थानीय तहको निर्वाचनमा मुस्लिमहरुको रोजा (ब्रत) परेका कारण उक्त मिति सार्नुपर्ने माग गरेका हुन् ।उनले स्थानीय निर्वाचन अघि भएको सम्झौता पुरा गर्नुपर्ने समेत बताएका छन् । उनले विगतको सम्झौतालाई ध्यानमा राख्दै संबिधान संशोधन हुनुपर्ने माग गरे ।
संविधान संशोधनका लागि पटक पटक दवाव दिएपश्चात भएको सम्झौता छिटो पुरा भएमात्रै आफूहरुको आन्दोलन रोकिने उनले बताए ।सभामा फोरम नेपालका वरिष्ठ नेता अशोक राई, उपाध्यक्ष मोहम्मद लालबाबु राउत, पूर्वमन्त्री एवं केन्द्रीय सदस्य इस्तियाक राईन, केन्द्रीय सदस्य चुुडामणी रेग्मी, कामता प्रसाद सोनखर, नेपाली कांग्रेसका पूर्व जिल्ला सदस्य तथा नवप्रबेशी फोरमका नेता सत्यनारायण बर्मा लगायत नेताले मधेशीहरु जनताहरुको असन्तुष्टिलाई सम्बोधन गरेर राष्ट्रिय सरकार निर्माण गर्नुपर्ने धारणा राखेका थिए ।
फोरम नेपालबाट नै मधेशी जनताको हक अधिकार स्थापित हुने भएकाले कांग्रेस, एमाले लगायत बिभेद गर्ने पार्टीहरुले कहिल्यै पनि मधेशीको हितममा हुन नसक्ने जिकिर गरेका थिए ।लोकतन्त्रमा सबैको सम्मान, सबैलाई अधिकार प्रदान गर्नुपर्ने भन्दै नेताहरु यस्ता कुराहरु ठुला पार्टीहरुले कार्यान्वयन ल्याउन नसकेको बताए ।
