2336 पटक हेरिएको 
पोखरा । क्रिसमस र अंग्रेजी नयाँ वर्षको अवसरमा पर्यटकीय नगरी पोखरामा आन्तरिक र बाह्य पर्यटकहरुले भरिभराउ भएका छन् ।
झन्डै २ दशकदेखि अंग्रेजी नयाँ बर्षमा सडक महोत्सव आयोजना गरिदै आएको छ। यसवर्ष पनि रेष्टुरेन्ट एण्ड बार एसोसिएसन पोखराले डिसेम्बर २८ देखि जनवरी १ सम्म लेकसाइडको ३ किलोमिटर क्षेत्रमा ‘सडकमै खाउँ, सडक मै नाचौं, सडकमै रमाउँ’ भन्ने नारा दिएर महोत्सव आयोजना गर्दैछन्।
वर्षेनी क्रिसमस र नयाँवर्षको समयमा नेपाल भ्रमणमा रहेका पर्यटकहरु बसाइ लम्ब्याएर बस्छन् भने आन्तरिक पर्यटनहरु पनि त्यतिकै मात्रमा मनोरञ्जनका लागि पोखरा भित्रिने गर्दछन् । लेकसाईडका पर्यटनसँग सम्बद्ध होटल तथा रेष्टुरेण्ट व्यवसायीहरुले क्रिसमस र नयाँवर्षको आगमनसँगै आफ्नो व्यवसायिक प्रतिष्ठानलाई दुलही झैं सिंगारेर आकर्षक बनाएका छन।
प्रत्येक होटल र रेष्टुरेण्टले पनि स्थानीय एवं राष्ट्रिय कलाकार बोलाएर महोत्सवलाई विशेष बनाउने तयारी थालेका छन्। क्रिसमस र नयाँवर्षको अवसरमा होटलहरु धमाधम बुकिङ भइरहेको छ । ‘नयाँ बर्ष र क्रिसमसमा बढी भिडभाड हुने भएकोले आन्तरिक तथा बाह्य पर्यटकले अग्रिम होटल बुकिङ गरेका छन् ।
पोखरामा पर्यटक लक्षित ५ सय भन्दा बढी होटल छन्। साना तथा ठूला पर्यटकीय स्तरका होटलहरुमा २२ हजार भन्दा बढी कोठा रहेका छन्। पोखरामा सञ्चालिन अन्य होटलको सहित २५ हजार भन्दा बढी वेड रहेका छन्।
