672 पटक हेरिएको 
चितवन,चितवनको नारायणगढ–मुग्लिन सडकखण्डअन्तर्गत घुमाउनेमा भित्तो काट्ने क्रममा भेटिएको जोखिमयुक्त चट्टानका कारण अहिले सवारी आवागमन रोकिएको छ।
बिहान १० बजेदेखि ४ बजेसम्म सडक बन्द गरेर भित्तो काट्ने काम सुरु गरिए पनि जोखिमयुक्त चट्टान भेटिएकाले ४ बजेपछि खुल्नुपर्ने सडक चट्टानका कारण मंगलबार साँझ ६ बजेसम्म संचालनमा आउन सकेको छैन।
चितवनका ट्राफिक प्रहरी प्रमुख तथा प्रहरी निरीक्षक सन्तोष पन्तका अनुसार मंगलबार ४ बजेबाट सवारी खुल्नुपर्नेमा चट्टानका कारण जोखिम भएकाले फोरेर हटाउन समय लागेकाले गाडी नखुलेको हो। ‘भित्तोबाट जोखिमयुक्त ठूलो ढुंगा झारेर पौने ३ बजेबाट फोर्ने काम भइरहेको छ’, नारायणगढ–मुग्लिक सडक आयोजनाका इन्जिनियर शिव खनालले भने, ‘ढुंगो हटाएपछि सवारी चल्छ।’ प्रहरीका अनुसार चट्टान पन्छाउन अझै केही समय लाग्ने भएकाले धैर्य गर्न यात्रु र यातायातकर्मीहरूलाई आग्रह गरिएको छ ।
चितवनबाट जाने तयारीमा रहेका सवारीहरू र काठमाडौंबाट पोखरा आउने सवारीहरूको समेत उक्त सडकमा ठूलो लाइन छ । राती बन्द गरेर काम हुँदै आएको उक्त सडकमा यही माघ १३ गतेबाट दिउँसो १० बजेदेखि ४ बजेसम्म ६ घण्टा रोकेर भित्तो काट्ने काम सुरु गरिएको थियो। गएको दुई वर्षदेखि उक्त सडकको ३४ किलोमिटर क्षेत्र चौडा पार्ने काम जारी छ । सडकको घुमाउने, १६ किलो र चेपाङ डाँडामा भित्तो काट्ने काम बाँकी रहेको छ। हालसम्म उक्त सडकखण्डको ७२।४ प्रतिशत काम सम्पन्न भएको आयोजनाका इन्जिनियर खनालले बताए । सडक संचालन गर्न ढिला भएकाले आजको सवारीले रातभर नै उक्त सडक प्रभावित हुने बताइएको छ ।
