758 पटक हेरिएको 
काठमाडौं । प्रधानमन्त्री केपी शर्मा ओलीले तेस्रो पटक मन्त्रिपरिषद् विस्तार गरेका छन् । ओलीले आफ्नै पार्टी नेकपा एमाले र सत्ता गठबन्धनको दोस्रो ठूलो दल माओवादी केन्द्रका १५ जना नेतालाई सरकारमा सहभागी गराएका छन्। नयाँ १५ मन्त्री तथा राज्यमन्त्रीको राष्ट्रपति कार्यालय शीतल निवासमा शपथ ग्रहण भएको छ । राष्ट्रपति विद्यादेवी भण्डारीले नयाँ मन्त्रीहरूलाई शपथ गराएकी छन् । शपथ ग्रहण कार्यक्रममा उपराष्ट्रपति नन्दबहादुर पुन, प्रधानमन्त्री केपी शर्मा ओली, पूर्व प्रधानमन्त्री पुष्पकमल दाहाल प्रचण्ड, सभामुख कृष्णबहादुर महरा, राष्ट्रियसभाका अध्यक्ष गणेशप्रसाद तिमिल्सिना, कायममुकायम प्रधानन्यायाधीश दीपकप्रसाद जोशी लगायतको उपस्थिति रहेको थियो । अपराह्न ४ बजे तय गरिएको शपथ ग्रहण कार्यक्रम राष्ट्रियसभाको उपसभामुखको निर्वाचनका कारण ढिलो भएको थियो । एमाले र माओवादीले शुक्रबार मात्रै मन्त्री बन्ने नेताहरूको नामको टुंगो लगाएका थिए ।
माओवादीबाट पाँच मन्त्री र एक राज्यमन्त्रीसहित छ नेता ओली सरकारमा सहभागी भएका छन् । माओवादी नेता वर्षमान पुनले ऊर्जा तथा जलस्रोतमन्त्रीका रूपमा मन्त्रिपरिषद्मा सहभागी भएका छन् । त्यस्तै, गिरिराजमणि पोखरेलले शिक्षामन्त्रीको शपथ लिँदा शक्ति बस्नेतले वन मन्त्रालयको जिम्मेवारी पाएका छन् । यी तीन नेताले माओवादीबाट यसअघि पनि मन्त्री बनिसकेका हुन् । त्यस्तै, ओवादीबाट चक्रपाणि खनाल र बिना मगर मन्त्री बनेका छन्। खनाललाई भूमिसुधार र मगरलाई खानेपानी मन्त्री बनाइएको छ । त्यस्तै रामकुमारी चौधरी कृषी तथा भूमिसुधार राज्यमन्त्री बनेकी छन्।
एमालेबाट मन्त्रिपरिषद्मा सहभागी हुने नेताहरूको नाम प्रधानमन्त्री एवं एमाले अध्यक्ष ओलीले पार्टीका शीर्ष नेताहरूसँगको छलफलबाट शुक्रबार मात्रै अन्तिम रूप दिएका थिए । माओवादी केन्द्रका अध्यक्ष प्रचण्डले पनि पार्टीका शीर्ष नेताहरूसँगको छलफलपछि मन्त्रिपरिषद्मा सहभागी हुने नेताहरूको नामको सूची प्रधानमन्त्रीलाई शुक्रबार दिउँसो बुझाएका थिए ।
मन्त्रीको शपथ ग्रहण गर्नेमा एमालेका दुई सचिव रहेका छन्। सचिव प्रदिप ज्ञवालीलाई परराष्ट्र मन्त्री बनाइएको छ भने अर्का सचिव गोकर्ण विष्टलाई श्रम तथा रोजगार मन्त्रालयको जिम्मेवारी दिइएको छ । त्यस्तै, पर्यटन मन्त्रीमा रवीन्द्र अधिकारी अधिकारीले शपथ लिएका छन् भने रघुवीर महासेठले भौतिक पुर्वाधार मन्त्रालयको जिम्मेवारी पाएका छन् । शेरबहादुर तामाङ कानुनमन्त्री, जगत विश्वकर्मा युवा तथा खेलकुदमन्त्री भएका छन् भने गोकुल बास्कोटालाई सञ्चार राज्यमन्त्रीका रुपमा मन्त्रिपरिषद्मा सहभागी गराइएको छ । जगतबहादुर विश्वकर्मा युवा तथा खेलकुद मन्त्री बनेका छन्। सञ्चारमन्त्रीमा कसैलाई जिम्मेवारी नदिइएकाले बास्कोटा मन्त्रिपरिषद्मा सहभागी हुनेछन् । यसअघि वातावरण मन्त्रालयको जिम्मेवारी पाएका लालबाबु पण्डितलाई संघीय मामिला तथा सामान्य प्रशासन मन्त्रालयको जिम्मेवारी दिइएको छ । एमालेबाट पद्मा अर्याल स्वास्थ्य राज्यमन्त्री बनेकी छन् । त्यस्तै धनबहादुर बुढा संस्कृति राज्यमन्त्री बनेका छन् ।
