कर्णाली महोत्सवको रौनक

पूर्वोत्तरमा पर्ने बाजुराको कुण्डा क्षेत्रमै पहिलो पटक यसरी एकै थलोमा एकै साथ स्थानीय कला संस्कृतिहरू प्रस्तुत गरिएका छन् । कुण्डा क्षेत्रको विकासका सम्भावनाको पहिचान र कर्णाली सम्भयताको जगमा बनेका स्थानीय कला र संस्कृति प्रवर्द्धन गर्ने उद्देश्यले पहिलो पटक बाजुरा, हुम्ला र मुगुको संगम कर्णाली किनारमा रहेको बाजुराको धुलाचौरमा सोमबारदेखि महोत्सवको आयोजना गरिएको छ । बाजुराको कुण्डा क्षेत्रका हिमाली र स्वामीकार्तिक खापर गाउँपालिकाले संयुक्त रुपमा महोत्सवको आयोजना गरेका हुन् ।

महोत्सवमा गायन क्षेत्रमा राष्ट्रिय पहिचान बनाएका बाजुराका बाल गायक सुप्रिम मल्ल, प्रभुराज पाण्डे, विनोद बाजुराली, प्रकाश थापा, हर्क खडायतलगायतका स्थानीय संस्कृति झल्किने गीत संगीतले यहाँको माहौल झुमिरहेको छ । कुण्डा क्षेत्रका नागरिक अगुवा जनेश भण्डारीले कुण्डा क्षेत्रमा पहिलो पटक भएको यस महोत्सवले यहाँका पर्यटकीय गन्तव्य र स्थानीय उत्पादनको प्रवर्द्धन गर्ने मात्र नभई कर्णाली क्षेत्रको कला र संस्कृतिको संरक्षण गर्न पनि महत्त्वपूर्ण भूमिका खेलेको बताए ।

‘महोत्सवलाई माध्यम बनाएर पछाडि परेको यस क्षेत्रको विकास सम्भावनाबारे औपचारिक बहसको थालनी हुनु अर्को महत्त्वपूर्ण पक्ष हो,’ उनले भने । महोत्सवको उद्घाटन गर्दै प्रतिनिधिसभाका सदस्य एवं नेपाली कांग्रेसका सहमहामन्त्री बद्रीप्रसाद पाण्डेले बाजुराको विकासका लागि राजनीतिक दलहरूबीच सहकार्य अपरिहार्य रहेको बताए । ‘बाजुरा भन्नेबित्तिकै लडाइँ–झगडा हुने, काटमार हुने जिल्लाको परिचय बनेको छ । अहिले त जिल्लामा सीडीयो, डीएसपीलगायतका अफिसरहरू पनि सकभर बाजुरा आउन चाहँदैनन्,’ सांसद पाण्डेले भने, ‘कांग्रेसको तलदेखि माथिसम्मको जिम्मेवारी म लिन्छु, एमालेको जिम्मेवारी लिन कर्णबहादुर थापालगायत तयार हुन पर्‍यो ।

’कार्यक्रममा प्रदेश सरकारका आर्थिक मामिलामन्त्री नरेशकुमार शाहीले राजनीतिक पूर्वाग्रहभन्दा माथि उठेर विकास निर्माणका सवालमा एकजुट भएमात्रै पछाडि परेको बाजुरालाई उठाउन सकिने बताए । ‘मानव विकास सूचकांकमा पुछारमा परेको बाजुराको विकासका लागि प्रदेश सरकारले प्राथमिकता दिनेछ,’ स्थानीय समेत रहेका मन्त्री शाहीले, ‘विकासका योजनाहरूमा समूदायको अपनत्वले मात्रै गुणस्तरीय काम हुनसक्छ ।’