156 पटक हेरिएको 
म्याग्दी । म्याग्दीका तुलसी पुन मगर दक्षिण कोरियामा झुण्डिएको अवस्थामा मृत फेला परेकाछन । जिल्लाको मालिका गाउँपालिका –१, निस्कोटस्थित जुबाङ घर भई हाल रोजगारीको सिलसिलामा दक्षिण कोरियाको मोक्पो छल्लानाम्दो उल्सानस्थित छुकसान बङ्गुर फार्ममा कार्यरत कामदार तुल्सी पुन मगर शनिबार राति साढे १ बजेको समयमा सोही फार्मनजिक रहेको पुलमा झुण्डिएको अवस्थामा मृत फेला परेकाहुन ।
मृतक तुल्सीका काकाको छोराभाइ सुजन पुनले दाजु तुल्सीसँगै एउटै कम्पनीमा कार्यरत अर्का कामदार मिलन तामाङले फोनमार्फत दिइएको भनाइलाई उद्धृत गर्दै भने, ‘‘दाजुसँगै कम्पनीमा काम गर्ने साथी मिलन तामाङले साहुको अत्याचार र दुर्व्यवहार सहन नसकेर तपाईंको दाइ तुल्सीले फार्मनजिक रहेको पुलमा झुण्डिएर आत्महत्या गरेको हामीलाई जानकारी दिइएको छ । ’’
तुल्सी गत असोजमा मात्र इपिएसमार्फत त्यहाँ पुगेकाथिए । कोरियामा तुल्सीको मृत्यु भएको खबरले परिवारका सदस्य शोकमा डुबेको छ । कोरियाबाट म्याग्दी प्रवासी नेपाली सङ्घ (मोना) दक्षिण कोरियाका अध्यक्ष दुर्गा भण्डारी र पत्रकार मनोज गुरुङले तुल्सीको मृत्यु भएको र शव अहिले प्रहरीले लगेर अस्पतालमा राखेको जानकारी दिएकाछन ।
पत्रकार गुरुङका अनुसार, आत्महत्या वा हत्या भन्ने बारेमा थप छानबिन हुन बाँकी छ । मृतक तुल्सीका घटनाबारे कोरियास्थित नेपाली राजदुतावास, एनआरएनए, एमटियु, मोनालगायत नेपालीले चासो दिएका छन् । मृतक तुल्सीका परिवार, कोरियास्थित नेपाली राजदुतावास, एनआरएनए, एमटियु, मोनालगायत नेपालीले घटनाबारे गम्भीर अनुसन्धान गर्न र संलग्न दोषीलाई कडा कारबाही गर्न त्यहाँको सरकारसँग माग गरेका छन् ।
मृतक तुल्सी पुन मगरका एक दाजु र एक बहिनी छन । बुवाआमाको पहिले नै निधन भइसकेको छ । मृतक तुल्सीका काका छोराभाइ सुजन पुनका अनुसार कोरियन भाषा (इपिएस) परीक्षा पास गरेर गत असोजमा मात्र कोरिया पुगेका २८ वर्षीय तुल्सी त्यसअघि रोजगारीको सिलसिलामा साउदी अरेबियामा एक वर्ष बसेर कोरिया जाने उद्देश्यसहित घर आएका थिए ।
